Tři měšćanske wěže a jedna straža skićachu w srjedźowěku přistup do města. Budyske wrota stejachu na dźensnišej Budyskej dróze, takrjec napřećo dźensnišej dönerowej zakuskarni. Haska mjez zakuskarnju a pěstowarnju „Wustaw Jakubeca“ běše něhdy měšćanska hrjebja, kotraž so zady piwarnje ćehnješe – dźensa je to dróha „Při měšćanskej hrjebi“.
Na Kamjenskej dróze stejachu něhdy Kamjenske wrota napřećo dźensnišej lěkarskej praksy König/Richter (dom čo. 24). A Wojerowske wrota stejachu na róžku dźensnišeje Augusta Bebeloweje a Wojerowskeje dróhi. Něhdyšej měšćanskej hrjebi přizamkny so Młynska hrjebja, kotraž dźensa hišće nimo „Blejchi“ a blisko měšćanske hata ćeče. Hdźež dźensa Kumerec statok steji běše něhdy móst ze stražu.
prěnje naspomnjenje
W planje města z časa po wulkim wohenju 1780 su troje měšćanske wrota a hrjebja při wobornym nasypje zarysowane. žórło: archiw Kulowskeje katolskeje wosady
| 1248 | prěnje naspomnjenje jako „villa Witigenow“ |
| 1264 | naspomnjenje jako „Wittigenowe nova villa” |
| 1286 | prěnje naspomnjenje jako město – „civitatem Witigenhow“ |
| 1303 | spožčenje nišeho sudnistwa po Magdeburgskim prawje (hač do 1849) |
| 1345 | W Kulowje skutkuje prěni łazenk. |
| 1346 | We wójnje kejžora Korle IV. přećiwo markhrabi Ludwigej Bayerskemu bu Kulow zničeny. |
| 1349 | Kejžor Korla IV. spožči Kulowej prawo, tydźenske wiki wotměwać. |
| 1356 | Město Kulow dóstanje piwarske prawo. |
| 1429 | W husitskich wójnach bu Kulow zničeny. |
| 1438 | Kral Albrecht spožči prawo wikowanja ze sólu. |
| 1440-1445 | twar měšćanskeje cyrkwje jako pózdnjogotiska halowa cyrkej, wokoło 1527 wutwar wjelbow a rozšěrjenje wo dwaj stołpaj |
| 1446 | powołanje druheho duchowneho za wosadnu cyrkej |
| 1447 | Kulow dóstanje prawo swobodnych wólbow magistrata. |
| 1460 | Na kóncu dróhow do Budyšina, Kamjenca a Wojerec natwarja krute měšćanske wrota. |
| 1491 | prěni dokument wo gildźe třělcow |