Tule předstajamy někotre wuznamne wosobiny, kiž su so w Kulowje narodźili abo kiž su dlěši čas w našim měsće bydlili.

  • Johann von Schadowitz, tež Janko Šajatowić (1624-1704)
  • W Chorwatskej rodźeny von Schadowitz běše škitny gardist sakskeho kurwjercha Jana Jurja II. a Jana Jurja III., pozdźišo samo podpołkownik a načolnik gardy jězdnych. Wot 1691 běše knježk na wudworju we Wulkich Ždźarach. We Łužicy wobhladuja jeho jako přikład za serbsku bajowu postawu Krabata. Jako praktikowacy katolik bu von Schadowitz w Kulowskej cyrkwi pochowany.
  • Martin Ferdinand Brückner von Brückenstein (1631-1700)
  • běše jedyn z pjeć z Kulowa pochadźacych katolskich biskopow. Wot 1676  hač do swojeje smjerće wón serbske katolske pismowstwo zasłužbnje spěchowaše.
  • Jurij Hawštyn Swětlik (1650-1729)
  • běše katolski duchowny. Přełoži swjate pismo do serbšćiny a stwori prěni ćišćany serbski słownik „Vocabularium Latino-Serbicum“.
  • Maćij Wjacław Jakula (1655-1738)
  • běše wuznamny rězbar doby baroka. Jeho skulptury steja mjez druhim w Kulowskej wosadnej cyrkwi a na Karlowym mosće w Praze. 
  • Xaver Jakub Ticin (1656-1693)
  • běše serbski jezuit a spisa prěnju hornjoserbsku gramatiku. Zemrě jako wojerski kapłan blisko Beograda we wójnje přećiwo Turkam.   
  • Matthäus Joseph Ignatz Vitzk (1660-1713)
  • běše wot 1700 naslědnik Kulowskeho biskopa Brückensteina w Budyšinje. Vitzk zawostaji wobšěrnu, kulturnohistorisce hódnotnu awtobiografiju jako rukopis.
  • Měrćin Nuk z Lichtenhofa (1720-1780)
  • běše 23 lět biskop w Budyšinje.
  • Franc Jurij Lok (1751-1831)
  • běše biskop a wuznamny zastupjer katolskeho rozswětlerstwa w Hornjej Łužicy.
  • Herta Nikovich (1923-1994)
  • wotkaza Kulowej zamóženstwo we wysokosći 102.000 dolarow za spěchowanje kubłanja, za ludowe kubłanje a powołanske wukubłanje a podpěru młodostnych. Załožba „Kulowske dźěći – załožba Mrs. Nikovich“ dźědźinstwo rjaduje. Herta Nikovich pochadźeše z Kulowa, ale bě w USA žiwa.
  • Günter Särchen (1927-2004)
  • běše katolski socialny pedagog, publicist a pućrubar němsko-pólskeho wujednanja. Särchen je čestny wobydler Kulowa.
  • Hubertus Zomack (*1941)
  • je katolski teologa a duchowny. Běše generalny wikar Zhorjelskeho biskopstwa. 
  • Waltraut Skoddow (1942-2014), spisowaćelka
  • Peter Schowtka (*1945)
  • politikar (CDU), bě wot 1991 do 2014 zapósłanc Sakskeho krajneho sejma a wot 1990 do 1994 Kulowski měšćanosta.
  • Ulrich Pogoda (*1954)
  • je serbski komponist klasiskeje hudźby.
  • Ulrich Klinkert (*1955)
  • politikar (CDU), běše wot 1990 do 2002 zapósłanc Zwjazkoweho sejma. Wot 1994 do 1998 dźěłaše jako parlamentariski statny sekretar w Zwjazkowym ministerstwje za wobswět, škit přirody a wěstotu reaktorow.
  • Martin Paul Zschornak (*1987)
  • je hudźbnik, DJ a producent elektroniskeje hudźby. Jeho mjeno jako wuměłc je Seth Schwarz. W klubach a na festiwalach je po wšěm swěće požadany. Z live-hraćom na e-wiolinje spožča Zschornack swojej hudźbje wosebity raz.