Iniciatiwy, kiž su powšitkownje wužitne, móža sej minibus našeho města požčić. Za swoje dźěło za dźěći a młodźinu móža Kulowske skupiny bus bjezpłatnje wužiwać; trjebaja jón jenož zaso z połnym tankom wróćić. Naš VW T5 Caravelle ma wosom městnow, wulki kófrowy rum a kuplowanku za připowěšak. Jako “taksu mobility” smy sej bus w lěće 2005 z pomocu spěchowanskich srědkow sakskeje statneje kenclije na zakładźe směrnicy „demografija“ kupili. Z toho časa je awto wosebje kónc tydźenja na aktiwity Kulowskich towarstwow často po puću. Kulowske rejwanske skupiny z nim na swoje wustupy jězdźa. Skawtow wjeze wón na nowe dožiwjenja. Srjedu wuchowanscy płuwarjo z nim na trening jězdźa. Tež našej šuli, šulski klub, koparjo DJK, wohnjowa wobora młodźiny a wosadna katolska młodźina bus za jězby na swoje zarjadowanja wužiwaja. 

Na tute wašnje je jězdźidło kóžde lěto tysacy kilometrow na dobro dźěła z dźěćimi a młodźinu po puću. Zmóžnja poskitki, kiž njehodźa so ze zjawnymi wobchadniskimi srědkami tak lochko zwoprawdźeć abo kiž bychu wjele dróše byli. Tež dźakowano minibusej je dźěło z dźěćimi a młodźinu w měsće pisane. Dźěćom z financielnje słabšich swójbow pak k tomu dopomha, zo móža so na wólnočasnych poskitkach w regionje wobdźěleć. 

KONTAKT

Beate Hufnagel

Torhošćo 1
02997 Kulow

stwa 11
telefon: 035725/75520

powěsć pósłać

KALENDER ZA SKAZANJE

 do kalendra pohladać