wotstronjenje wotpadkow

Najkmańše wotpadki su tajke, kiž scyła hakle njenastanu. Hač žiwidła, wěcy wšědneje potrjeby abo druhe produkty – kupujće rozumnje a hladajće, zo z materialom za zapakowanje lutujeće. To njeje jenož lěpje za wobswět, ale tež za Wašu móšničku. Přetož za wotpadki priwatnych domjacnosćow je wokrjes Budyšin zamołwity. A cyłkowne kóšty za wotwoženje wotpadkow wón na jednotliweho wobydlerja přeliči; tutón popłatk ma potom kóždy płaćić.

Hdyž tuž mjenje wotpadkow „nadźěłamy“, su kóšty jich wotstronjenja wězo mjeńše. Nimo toho je wažne, zo wotpadki porjadnje sortěrujemy. Wokrjes Budyšin kóždej domjacnosći tony, kotrež trjeba a sej skaza, přiwjeze: šěru tonu, bio-tonu, tonu za plastu abo módru tonu za papjeru. Terminy wuprózdnjenja a pokiwy nastupajo „wotpadki w domjacnosći“ móžeće z „Protyki wotpadkow 2020“ zhonić, kotruž w radnicy dóstanjeće abo kiž móžeće sej tule downloadować.

Za stare bleše/škleńcy a staru papjeru steja na wěstych městnach cyłe lěto containery. Prosymy Was porjada a wěstoty dla a zo njebychu přidatne kóšty nastali, zo wotpadki njestajiće pódla containera, ale zo je hnydom nutř tyknjeće. Zakazane tež je, swój spěrawy stary čapor při tutych containery wotbyć. Štóž so po tym nima, tomu hrozy pokuta.

Škódne maćizny móžeće dwójce wob lěto w specielnym mobilu bjezpłatnje wotedać. Hdy a hdźe budźe mobil stać, so w jednotliwych wsach wozjewi.

Wotwoženje spěraweho stareho čapora móžeće sej z póstowej kartku skazać. Wupjelńće a pósćelće ju prošu krajnoradnemu zarjadej. Potom dóstanjeće termin za wotwoženje.

Zelene wotpadki ze zahrody, kaž lisćo, trawu, hałzy, słomu abo syno, móžeće pola VRD w Brěžkach abo dalšich poskićowarjow w regionje wotedać. Za to pak dyrbiće płaćić.