Bjez fungowaceho drobneho wikowanja, bjez hosćencow, posłužbarjow a rjemjeslniskich zawodow sej žiwjenje w našim měsće, kiž ma dosć wjesny raz, njemóžeš předstajić. Sylne předewzaća su nam zakład za solidne wuwiće města a regiona. Garantuja dosć dźěłowych městnow kaž tež tworjenje hódnotow w regionalnych rjećazach a socialny angažement. A tuž je jasne, zo je spěchowanje hospodarstwa naležnosć šefa. Měšćanosta Markus Posch je přeco k rozmołwje zwólniwy.
Spěchowanje hospodarstwa je za nas wjace hač jenož pytanje za inwestorami. Jako město mjenujcy tež tudyše předewzaća, posłužbarjow a přemysłownikow podpěrujemy a spěchujemy w tym, zo kontakty sposrědkujemy, při pytanju spěchowanskich programow pomhamy, zo wupokazujemy přemysłowe přestrjenje a stejnišća za přemysło a hišće wjele wjac. Prócujemy so, zo za kóžde prašenje indiwiduelne rozrisanje namakamy, z kotrymž je pytacy spokojom a kiž zdobom wuwiću města a regiona słuži.
Wožiwjenje centruma města słuša k centralnym nadawkam w našim času. Přiběrace nakupowanje w interneće tež naše wobchody potrjechja, a tak pytaja drobnowikowarjo, posłužbarjo, zarjadnistwo a entuziasća za nowymi pućemi, zo bychmy srjedźišćo města wožiwjeli a přez wšelake eventy wjace wopytowarjow nawabili.
Wulkotne přikłady za to su nócne nakupowanje, akciji „Nakupuj doma“ a “Witamy nowonarodźenych”, kiž je naš zwjazk přemysłownikow njedawno zawjedł.
