Historiski wopon Kulowa, kotryž bě dołho na fasadźe připrawjeny. Dźensa móžeš jón w schodźišću radnicy widźeć.
Wopon města Kulowa pochadźa drje ze 16. lětstotka. 1639 so prěni raz naspomni.
Předstaja Mać Božu w módrym płašću a ze slěbornym swjatosćinom. Na lěwej ruce ma Jězusdźěćatko a w prawej ceptar. Steji na slěbornym połměsačku, kiž ma tři slěborne róže na kóždym kónčku.
Kulow słušeše wot 1289 klóštrej cistercienskich knježnow Marijina hwězda – tohodla drje so Mać Boža jako motiw we woponje jewi.
Za čas II. swětoweje wójny wopon z radnicy wotstronichu. Na namjet Theobalda Fuchsa, kiž bě farar w Kulowje, jón 15. awgusta 1945 na patronatym swjedźenju Maćerje Božeje zaso na radnicy připrawichu. Nalěto 1993 přičinichu na radnicy nowu wersiju wopona, dokelž bě stary – byrnjež hakle 1986 restawrowany – hižo zaso chětro poćerpjeł. Original móžeš sej dźensa w radnicy wobhladać.