wróćo na přehlad

Salow leži něhdźe 2 km južnje Kulowa. Mjeno wsy so z tym wujasnja, zo Salow sydlerjo załožichu, kotřiž běchu z kónčiny při rěce Solawje sem přićahnyli. To běchu Serbja, kiž chcychu wuchodnej ekspansiji Němcow wućeknyć. 

Salow so 1264 prěni raz pisomnje naspomnja. Klóšter Marijina hwězda bě wjes tehdom hromadźe ze susodnymi Sulšecami za 120 hriwnow kupił. Přez lětstotki su so Salowčenjo z rólnistwa a skotarstwa žiwili. Poćerpjechu bědu mnohich wójnow. 1429 husića wjes nimale cyle zničichu. W I. a II. swětowej wójnje wosta wjele muži ze wsy we wójnje, štož bě za wjesnu zhromadnosć a dalše wobstaće wsy wulke wužadanje. Serbsku rěč a kulturu ludźo w Salowje tež dźensa swěru haja.

Wot srjedź 19. lětstotka běše w Salowje cyhelnica. 1884 bu generator instalowany, kotryž mały zawod a cyłu wjes z milinu zastarowaše. Hižo dobrych 100 lět z milinu – kotra wjes móže to wo sebi prajić? 

Dźensa ma zawod „Zastaranje z energiju Čorny Halštrow“ na ležownosći něhdyšeje cyhelnicy swoje sydło. Wón bě so krótko po přewróće wo to postarał, zo so energijowe hospodarstwo w gmejnje modernizuje, a to na bazy płuna. 

krótka info

prěnje naspomnjenje: 1264
zagmejnowanje: 1994
ličba wobydlerjow: 172
ličba bydlenskich domow: 48
wjesna předstejićerka: Gudrun Krahl

ZAJIMAWOSTKI

Kapałka w Salowje

Dźensniše twarjenje nasta 1953. Zwón, kiž bě něhdy w Kulowskej cyrkwi wosadźe słužił, ze 16 m wysokeje wěže na pobožnosće přeprošuje.  

Předchadnik Salowskeje cyrkwički bu 1956 spotorhany. W kapałce steji swjateje Marcyna  postawa ze 17. lětstotka, kotruž běchu družki ze Salowa na putnikowanja do Róžanta njesli. 

Impressionen: