wróćo na přehlad

Mučow leži při B96 něhdźe 5 km wuchodnje Kulowa. 

Přez wjes ćeče Čornica. Wjesne mjeno pokazuje na mjeno wosoby jako zakład za pomjenowanje wsy; móžno pak tež je, zo mjeno na słowo „mutny“ nawjazuje. 

Klepane kamjenje, kotrež so tule namakachu, su po wšěm zdaću swědki sydlišća w srjedźnej kamjentnej dobje. Pokazuja na to, zo je tu čłowjek hižo před ca. 8.000 lětami sydlił. Swědki rownišća z bronzoweho časa su tři hlinjane sudobja. 

Zajimawy je skelet, kotryž su při twarje zjawneje kupjele pola Hórnikec blisko Čorneje hrjebje namakali. Při skeleće namakachu hlinjane sudobja, kiž wo tym swědča, zo bu wony njebohi w 14. abo 15. lětstotku tu pohrjebany. Jemu běchu podołhojtej kruchaj železa mjez zuby tyknyli, ruce ležeštej na hrudźi, jako byštej sputanej byłoj. Tole na to pokazuje, zo so wo čłowječe powostanki tak mjenowaneje njesmjertneje duše jedna. Ludźo so tajkich njebohich bojachu, dokelž pječa po smjerći šerjachu a móžachu žiwym zeškodźeć. 

Prěni raz bu wjes 1568 pisomnje naspomnjena. Za čas wuswobodźerskich wójnow steješe tu 50.000 wojakow. 

Krótko do I. swětoweje wójny započachu na juhowuchodźe wsy brunicu wudobywać. Nasta jama Werminghoff  a w susodnych Hórnikecach briketownja. Tehdy dóstachu mnozy burja w jamje a fabrice dźěło. Po wšej Łužicy znaty bu Mučow jako prěnje ratarske drustwo w lěće 1958.

1945 so brunicowa jama zapławi – nasta Hórnikečanski jězor, kiž bu bórze woblubowane bliske wočerstwjenišćo a centrum wodosporta w regionje. Wot lěta 2014 pak je jězor zašlahany, dokelž jeho přibrjóh skrućeja. Tute dźěło ma 2022 dokónčene być.

Wot 1994 słuša Mučow do Kulowskeje gmejny.

krótka info

prěnje naspomnjenje: 1568
zagmejnowanje: 1994
ličba wobydlerjow: 426
ličba bydlenskich domow: 155
wjesna předstejićerka: Katharina Witschas

Impressionen: