Koćina leži něhdźe 6 km južnje Kulowa. Klóšterska woda so tam do Čorneho Halštrowa wuliwa. Mjeno móhło być wotwodźenka wot wosoboweho mjena „Chot“. Ale tež wukładowanje jako „městno při rozdrjeńcy“ je plawsibelne, wšako wjes při małej wyšinje leži.
1248 so „Chotin“ w dokumenće klóštra Marijina hwězda prěni raz pisomnje naspomnja. Jako běchu husića 1429 po njewuspěšnych jednanjach wo měr Łužicu domapytali, bu tež Koćina zničena. A ležownostne mjeno „Koćina“ hišće na městno dopomina, hdźež bě wjes něhdy stała.
Kapałku w Koćinje natwarichu 1750. Ze starych rozprawow pak zhonimy, zo běše tu hižo wjele prjedy „prastara mała kapałka bjez duri, ze zachodom na třěše“.
Jan Serbin, kiž bě w 17. lětstotku kanonik a farar, wottud pochadźeše. Česćowanje hnadowneho městna Róžanta jemu wosebje na wutrobje ležeše. Móra dla nawjedowaše 1680 putnikowanje do Róžanta, kiž je hač do dźensnišeho z tradiciju. 1668 poda so Serbin ke kejžorej Leopoldej do Wiena a wobstara wopismo, kiž prawa katolskich wobydlerjow města Kulowa před protestantam přichilenym wukazom sakskeho kurwjercha škitaše.
1896 bě wulki woheń nimale wšitke statoki w Koćinje zničił. Tež z wulkej wodu mějachu so ludźo w Koćinje často bědźić, doniž Čorny Halštrow wokoło 1960 njeregulowachu.
krótka info
prěnje naspomnjenje: 1248
zagmejnowanje: 1994
ličba wobydlerjow: 204
ličba bydlenskich domow: 56
wjesny předstejićer: Hubertus Korch
ZAJIMAWOSTKI
Krabatowy swět mloka
Zwonka wsy móža sej hosćo „Krabatowy swět mloka“ wobhladać, hdźež dóstanu dohlad do kołoběha ratarskeje produkcije a móža čerstwe mloko, jogurt abo z ruku dźěłany twarožk woptać.
Impressionen:
