wróćo na přehlad

Erich Dieter Walkenhorst

Erich Dieter Walkenhorst je wuspěšny hospodarski manager a připóznaty eksperta za zemski płun, kiž ma tójšto mjezynarodnych nazhonjenjow. Wjele lět skutkowaše jako jednaćel Bad Honnef AG. W tutej funkciji přijědźe 1990 z Bad Honnefa do Kulowa, zo by tudyšu situaciju zastaranja z energiju analyzował.  

Powětr bě dla brunicoweje industrije a wjele domjacnosćow, kiž z wuhlom tepjachu, tehdy chětro zanjerodźeny. Walkenhorst wuwi zhromadnje z młodym měšćanskim zarjadnistwom Kulowa naročny plan: Hišće 1990 bu komunalna towaršnosć za zemski płun załožena.  

Erich Dieter Walkenhorst bě ze swojimi sobudźěłaćerjemi nimoměry wažny poradźowar za techniku a ekonomiju. Jeho njesebična a wěcywustojna podpěra w njeličomnych jednanjach z instancami a konkurowacymi zastaraćelemi z energiju móžeš lědma dosć hódnoćić. Zo maja město Kulow a komunje přisłušace wsy, ale tež mnohe susodne gmejny na teritoriju nimale 1.000 km² dźensa wobswětej přihódne zastaranje ze zemskim płunom, je wulka zasłužba Walkenhorsta.  

Mjeztym ma předewzaće „Zastaranje z energiju Čorny Halštrow tzwr.“ (EVSE) ze sydłom w Salowje/gmejna Kulow 15 sobudźěłaćerjow. Předewzaće njezastaruje region jenož ze zemskim płunom, běžitym płunom a milinu, ale podpěruje po wšěm teritoriju dźěćace a młodźinske towarstwa, wustupuje jako sponsor a ma wažne městno w kołoběhu tworjenja hódnotow w regionje. 

Za swój wulki angažement za wuwiće města Kulowa, wosebje pak za natwar předewzaća EVSE a jako dźak za jeho fachowy přewod hač do dźensnišeho bu Erich Dieter Walkenhorst čestny wobydler města Kulowa.