Kulowc so w sewjeru Kulowa direktnje dótka. Na juhozapadźe so Čorny Halštrow wokoło wsy wije a na wuchodźe ćeče Wudra.
Mjeno wsy pochadźa wot słowa “kulowc”, w kotrymž słowo kula tči. Kulowc je potajkim „mały kulowc“. Tutu formu sydlišća tež dźensa hišće derje spóznawaš. Wot 1936 do 1945 běchu nacisća serbske mjeno Kulowc z němskim Runddorf narunali.
W Kulowcu namakane dopokazy wo zasydlenju ludźi su něhdźe 3.000 lět stare. K tomu słušeja hlinjane črjopy, kiž su po wšěm zdaću z bronzoweho časa. Swoje korjenje ma Kulowc drje hižo z časa do 1248. Přetož Kulow, kotryž so w tutym lěće prěni raz pisomnje naspomnja, bu na zahonach Kulowca natwarjeny, a tak bu jeho mjeno wot mjena Kulowc wotwodźene.
Prěni pisomny zapisk wo wsy „Chula“ je z lěta 1286. 1308 je klóšter Marijina hwězda wjes za 70 slěbornych hriwnow kupił. W zańdźenych lětstotkach běchu wsy často woheń, wulku wodu, wójnu a mrětwy poćerpjeli, kiž sej wjele woporow žadachu. 1603 na přikład mór we wsy zachadźeše. Mortwych pohrjebachu na hórce při puću do Spal. Na wopory tuteje mrětwy dopominaše hač do njedawna drjewjane swjećo.
krótka info
prěnje naspomnjenje: 1286
zagmejnowanje: 1980
ličba wobydlerjow: 202
ličba bydlenskich domow: 70
wjesny předstejićer: Peter Schubert
ZAJIMAWOSTKI
Žłob z jahłoweho młyna
Před „Archu“, zetkawanišćom wjesnjanow w Kulowcu, steji něhdźe 3,5 m šěroki žłob ze zornowca. Pochadźa ze srjedźneho młyna, kotryž něhdy w lěsu mjez Kulowom a Dubrjeńkom steješe, kiž pak bu kónc 19. lětstotka spotorhany. W młynje běchu jahły mlěli. Kamjentny žłob trjebachu za tołkanje jahłow. Jahły běchu w prjedawšich časach wažna pica za skót a žiwidło za ludźi – jako muka za chlěb a wusmuž abo jako krupy do poliwki.
Baćonjace hnězdo
Wot lěta 1930 je dokumentowane, zo w Kulowcu baćony hnězdźa. Před něšto lětami je sej porik baćonow hnězdo w lipje při wjesnej łučinje natwarił. Tajke hnězdo w štomje je w našim regionje něšto wosebiteho.
Wjesna kapałka
Wot 1613 ma Kulowc kapałku. Nutřka je jenož 6 m² wulka a z tym drje je najmjeńša kapałka w Zhorjelskim biskopstwje.
Impressionen:
